दादरमध्ये समुत्कर्ष अभ्यासिकेचा वार्षिक महोत्सव उत्साहात; चित्रकार निशिकांत पलांडे यांचे विद्यार्थ्यांना प्रेरणादायी मार्गदर्शन
दादरमध्ये समुत्कर्ष अभ्यासिकेचा वार्षिक महोत्सव उत्साहात; चित्रकार निशिकांत पलांडे यांचे विद्यार्थ्यांना प्रेरणादायी मार्गदर्शन
मुंबई (गुरुदत्त वाकदेकर) : “यशाचा मार्ग हा नेहमीच खडतर प्रवासातून जातो. त्यामुळे विद्यार्थ्यांनी कष्टाचा बाऊ न करता आत्मविश्वासाने आणि सातत्याने पुढे वाटचाल करावी,” असे मौलिक विचार अनेक राष्ट्रीय व आंतरराष्ट्रीय पुरस्कारांनी गौरविलेले प्रसिद्ध चित्रकार श्री. निशिकांत पलांडे यांनी व्यक्त केले. सेवा सहयोग संस्थेच्या समुत्कर्ष अभ्यासिका प्रकल्पाचा वार्षिक महोत्सव रविवार, दिनांक १ फेब्रुवारी २०२६ रोजी दादर येथील बी. एन. वैद्य सभागृहात मोठ्या उत्साहात पार पडला.
प्रमुख अतिथी म्हणून उपस्थित असलेल्या श्री. पलांडे यांनी आपल्या बालपणीच्या खडतर जीवनप्रवासाचे अनुभव विद्यार्थ्यांशी शेअर करत संघर्ष, सातत्य आणि आत्मविश्वासाचे महत्त्व अधोरेखित केले. त्यांच्या प्रेरणादायी मार्गदर्शनामुळे उपस्थित विद्यार्थ्यांना भविष्यातील वाटचालीसाठी नवी दिशा व ऊर्जा मिळाली.
या वार्षिक महोत्सवासाठी सफाळे, कर्जत, बोईसर तसेच मुंबई व ठाणे येथून आलेले ४०० हून अधिक विद्यार्थी, शिक्षक, स्वयंसेवक आणि कॉर्पोरेट प्रतिनिधी उपस्थित होते. त्यांच्या उत्स्फूर्त सहभागामुळे सभागृह पूर्णतः भरून गेले होते आणि कार्यक्रमाला उत्सवी स्वरूप प्राप्त झाले होते.
समुत्कर्ष वर्षिकोत्सव स्पर्धा दरवर्षी भारतीय संकल्पनांवर आधारित घेतल्या जातात. यंदा युनेस्कोने राष्ट्रीय वारसा म्हणून घोषित केलेल्या १२ गडकिल्ल्यांवर आधारित वक्तृत्व, कथाकथन, समूहनृत्य, एकपात्री प्रयोग, समूहगायन अशा एकूण ११ स्पर्धा विभागांमध्ये, तसेच अंतर्विभागीय स्तरावर डिसेंबर आणि जानेवारी महिन्यात स्पर्धा आयोजित करण्यात आल्या. या स्पर्धांमध्ये ५०० हून अधिक विद्यार्थ्यांनी सहभाग नोंदवला होता.
अंतिम फेरीत यश संपादन केलेल्या १०० हून अधिक विद्यार्थ्यांना या कार्यक्रमात पारितोषिके देऊन सन्मानित करण्यात आले. पारितोषिकप्राप्त विद्यार्थ्यांनी आपल्या कला-सादरीकरणातून उपस्थित प्रेक्षकांना मंत्रमुग्ध केले. यावेळी प्रसिद्ध व्यावसायिक श्री. अंजनी अग्रवाल यांनीही विद्यार्थ्यांना उद्देशून प्रेरणादायी उद्बोधन केले. सेवा सहयोग फाउंडेशन शिक्षण, सबलीकरण आणि पर्यावरण या तीन महत्त्वाच्या आयामांवर आधारित एकूण १९ प्रकल्प राबवत असून, त्यातील समुत्कर्ष वार्षिक महोत्सव हा संस्थेच्या कार्याचा एक महत्त्वपूर्ण आणि उज्ज्वल पैलू असल्याची प्रचिती या सोहळ्यातून पुन्हा एकदा आली.
