रेडिओतून जिवंत राहते मराठी भाषा; ‘मराठी भाषा संवर्धन पंधरवडा २०२६’चा उत्साही आरंभ
रेडिओतून जिवंत राहते मराठी भाषा; ‘मराठी भाषा संवर्धन पंधरवडा २०२६’चा उत्साही आरंभ
मुंबई (गुरुदत्त वाकदेकर) : रेडिओच्या तरंगांवरून मराठी भाषा घराघरात पोहोचली, शब्दांना आवाज मिळाला आणि संस्कृतीला ओळख मिळाली, असे प्रतिपादन आर. जे. जगदीश यांनी केले. सेवा मंडळ एज्युकेशन सोसायटी संचालित श्रीमती मणिबेन एम. पी. शाह कला व वाणिज्य महिला स्वायत्त महाविद्यालयाच्या मराठी विभागच्या वतीने ‘मराठी भाषा संवर्धन पंधरवडा २०२६’ अंतर्गत विविध उपक्रमांचे आयोजन करण्यात आले. याचाच एक भाग म्हणून ‘रेडिओ हरवला आहे का?’ या विषयावर विशेष रेडिओवरील कार्यक्रम दि. १८ जानेवारी २०२६ रोजी पार पडला.
सदर कार्यक्रम रेडिओ पुणेरी आवाज १०७.८ एफ.एम च्या माध्यमातून ‘अलकची झलक’ या कार्यक्रमाद्वारे सादर करण्यात आला. या सत्राचे मार्गदर्शन आर. जे. जगदीश यांनी सायंकाळी ४ ते ५ या वेळेत केले. कार्यक्रमात रेडिओचे बदलते स्वरूप, आजच्या डिजिटल युगातील त्याचे महत्त्व आणि मराठी भाषेच्या प्रसारातील रेडिओची भूमिका यावर प्रकाश टाकण्यात आला. सहभागींना रेडिओच्या माध्यमातून भाषिक आणि सांस्कृतिक वारसा जपण्याचे महत्त्व अधोरेखित केले गेले.
यानंतर सायंकाळी ५ ते ६ या वेळेत ‘मुली रंगल्या काव्यात’ हा विशेष काव्यात्मक कार्यक्रम पार पडला. या कार्यक्रमाचे सादरीकरण आर. जे. माधवी यांनी केले. विद्यार्थिनींनी सादर केलेल्या कवितांमधून मराठी भाषेची गोडी, संवेदनशीलता आणि सृजनशीलता प्रभावीपणे मांडली गेली, ज्यामुळे उपस्थित प्रेक्षक मंत्रमुग्ध झाले.
रविवार, दि. १८ जानेवारी २०२६ रोजी पार पडलेल्या या कार्यक्रमाचे समालोचन सायंकाळी ६ ते ७ या वेळेत आर. जे. जगदीश यांनी केले. त्यांनी कार्यक्रमाचे शैक्षणिक, भाषिक आणि सांस्कृतिक महत्त्व अधोरेखित केले व विद्यार्थिनींशी सुसंवाद साधत रेडिओच्या माध्यमातून मराठी भाषेचे संवर्धन करण्याचे महत्त्व स्पष्ट केले.
सदर उपक्रमाचे निवेदन मराठी विभागप्रमुख डॉ. रश्मी शेटये तुपे यांनी केले, तर आभार प्रदर्शन सहाय्यक प्रा. माधवी पवार यांनी केले. मराठी भाषा संवर्धनासाठी रेडिओसारख्या प्रभावी माध्यमाचा उपयोग करून आयोजित केलेल्या या उपक्रमाला विद्यार्थिनींकडून उत्स्फूर्त प्रतिसाद मिळाला, ज्यामुळे कार्यक्रम यशस्वी व प्रेरणादायी ठरला.
