‘लेगसी फेस्ट’ने सोनोपंत दांडेकर शिक्षण मंडळाच्या विधी महाविद्यालयात रंगत आणली : तीन दिवस विविध सांस्कृतिक उपक्रमांचा उत्साहपूर्ण जल्लोष”
‘लेगसी फेस्ट’ने सोनोपंत दांडेकर शिक्षण मंडळाच्या विधी महाविद्यालयात रंगत आणली : तीन दिवस विविध सांस्कृतिक उपक्रमांचा उत्साहपूर्ण जल्लोष”
पालघर, (प्रतिनिधी)२० मार्च २०२६: सोनोपंत दांडेकर शिक्षण मंडळाच्या विधी महाविद्यालय, पालघर येथे आयोजित बहुप्रतीक्षित ‘लेगसी फेस्ट’ उत्साहात पार पडला. तीन दिवस चाललेल्या या महोत्सवामध्ये फनफेअर, बॉलिवूड डे, ट्विनिंग डे तसेच ‘वन मिनिट गेम्स’सारख्या विविध मनोरंजक उपक्रमांचा समावेश होता. या महोत्सवाची सांगता २० मार्च रोजी महाविद्यालयाच्या वार्षिक स्नेहसंमेलनाने झाली.
या कार्यक्रमास विद्यार्थी, अध्यापक व शिक्षकेतर कर्मचारी तसेच मान्यवरांची उपस्थिती लाभली. कार्यक्रमाची सुरुवात पारंपरिक दीपप्रज्वलनाने करण्यात आली. त्यानंतर विधी महाविद्यालयाच्या प्राचार्या डॉ. पायल चोलेरा यांनी स्वागतपर भाषण करून मागील शैक्षणिक वर्षातील शैक्षणिक व सहशैक्षणिक यशाचा आढावा घेतला.
या प्रसंगी व्यवस्थापन समितीचे अध्यक्ष सीए श्री. सचिन कोरे यांची माननीय उपस्थिती लाभली. त्यांच्या मार्गदर्शन व पाठबळामुळे संस्थेला सतत प्रेरणा मिळत असल्याचे नमूद करण्यात आले. तसेच व्यवस्थापन समितीच्या इतर सदस्यांचीही उपस्थिती होती. मान्यवर अतिथी म्हणून ज्येष्ठ अधिवक्ता डॉ. सुजय नितीन कांटावाला उपस्थित होते. अतिथींचा सन्मान विद्यार्थ्यांनी साकारलेल्या कलात्मक भेटवस्तू देऊन करण्यात आला, ज्यातून विद्यार्थ्यांनी कृतज्ञता व्यक्त केली.
कार्यक्रमातील सांस्कृतिक सादरीकरणांनी विशेष रंगत आणली. शास्त्रीय व आधुनिक नृत्य, संगीत सादरीकरणे, नाट्यप्रयोग आदी विविध कार्यक्रमांतून विद्यार्थ्यांनी आपली कला सादर केली. या सादरीकरणांना उपस्थितांचा उत्स्फूर्त प्रतिसाद लाभला असून विद्यार्थ्यांच्या सर्जनशीलता, शिस्त आणि संघभावनेचे उत्कृष्ट दर्शन घडले.
कार्यक्रमाची सांगता अंतिम वर्षातील विद्यार्थ्यांनी अध्यापक व शिक्षकेतर कर्मचाऱ्यांना अर्पण केलेल्या भावपूर्ण कृतज्ञतांजलीने झाली. तसेच महाविद्यालयाच्या सांस्कृतिक समिती, व्यवस्थापन समिती, अध्यापक व शिक्षकेतर कर्मचारी यांच्या योगदानाची दखल घेण्यात आली. या वार्षिक स्नेहसंमेलनामुळे सर्व उपस्थितांना अविस्मरणीय आठवणी मिळाल्या तसेच संस्थेबद्दल अभिमान व एकात्मतेची भावना अधिक दृढ झाली.
