डॉ. राजेश भोईर यांनी वडीलांना सेवारूपी श्रद्धांजली वाहीली
कल्याण -भिवंडी
मुंबई प्रतीनिधी: (सतिश पाटील )
पितृशोकातही समाजसेवेचा वसा; डॉ. राजेश भोईर यांनी वडिलांच्या स्मृतीप्रित्यर्थ गरिबांसाठी केले रुग्णालयाचे दरवाजे मोफत
स्वतःच्या आयुष्यात दुःखाचा डोंगर कोसळलेला असतानाही, समाजाच्या वेदनेवर फुंकर घालणारे व्यक्तिमत्व विरळेच असतात. कल्याणमधील ‘प्राणायु हॉस्पिटल’चे संचालक डॉ. राजेश भोईर यांनी आपल्या वडिलांच्या निधनानंतर केवळ अश्रू ढाळत न बसता, गोरगरीब रुग्णांसाठी सेवाकार्य सुरू करून वडिलांना अनोखी आणि ‘खरी श्रद्धांजली’ वाहिली आहे.
पितृछत्र हरपले, पण आधार बनले
डॉ. राजेश भोईर यांचे वडील कै. गंगाराम गोविंद भोईर यांचे नुकतेच (शुक्रवार, दि. १३/०२/२०२६) दुःखद निधन झाले. वडिलांच्या जाण्याने भोईर कुटुंबावर दुःखाची लाट पसरली. मात्र, वडिलांनी दिलेल्या संस्कारांची शिदोरी जपत, डॉ. राजेश यांनी एक महत्त्वपूर्ण निर्णय घेतला. वडिलांच्या पवित्र स्मृतीप्रित्यर्थ ‘प्राणायु हॉस्पिटल’मध्ये पुढील तीन महिने केमोथेरपी आणि डायलिसिसचे उपचार पूर्णपणे मोफत देण्याचे त्यांनी जाहीर केले आहे. ज्या उपचारांचा खर्च सर्वसामान्यांना परवडत नाही, ते उपचार मोफत करून त्यांनी शेकडो रुग्णांना मोठा दिलासा दिला आहे.
वडिलांचे संस्कार आणि ‘प्राणायु’ची सेवा
याबद्दल बोलताना डॉ. राजेश भोईर सांगतात, “माझे वडील श्री. गंगाराम भोईर हे एक वेगळेच रसायन होते. समोरची व्यक्ती कशीही असो, तिचा आदर करणे आणि आपल्याकडे जे आहे ते गरजूंना देण्याची वृत्ती त्यांच्यात होती. त्यांच्या निधनानंतर निर्माण झालेली पोकळी भरून काढता येणार नाही, पण त्यांच्या विचारधारेचे अनुकरण करून आम्ही हा अल्पसा प्रयत्न करत आहोत.”
केवळ केमोथेरपी आणि डायलिसिसवर न थांबता, लवकरच कल्याण आणि भिवंडी परिसरातील गोरगरीब रुग्णांसाठी सर्वात अल्प दरात (स्वस्त) सिटी स्कॅन (CT Scan), एक्स-रे (X-ray) आणि इतर महत्त्वाच्या तपासण्या उपलब्ध करून देण्याचा मानस डॉ. राजेश यांनी बोलून दाखवला आहे.
एका डॉक्टर पुत्राने आपल्या वडिलांना वाहिलेली ही ‘सेवारुपी श्रद्धांजली’ आज संपूर्ण ठाणे जिल्ह्यात कौतुकाचा विषय ठरली आहे. या उपक्रमास आणि भोईर कुटुंबाच्या धैर्यास मानाचा मुजरा!
