हेटमायरच्या वादळी अर्धशतकावर वेस्ट इंडीजचा स्कॉटलंडवर ३५ धावांनी दणदणीत विजय
हेटमायरच्या वादळी अर्धशतकावर वेस्ट इंडीजचा स्कॉटलंडवर ३५ धावांनी दणदणीत विजय
मुंबई (गुरुदत्त वाकदेकर) : आयसीसी पुरुष टी२० विश्वचषक २०२६ मधील दुसऱ्या सामन्यात गट क मध्ये वेस्ट इंडीजने स्कॉटलंडवर ३५ धावांनी दमदार विजय मिळवला. कोलकात्याच्या ऐतिहासिक ईडन गार्डन्स मैदानावर झालेल्या या सामन्यात वेस्ट इंडीजने फलंदाजी आणि गोलंदाजी या दोन्ही आघाड्यांवर वर्चस्व राखले. शिमरॉन हेटमायरची आक्रमक खेळी या विजयाची मुख्य शिल्पकार ठरली.
नाणेफेक जिंकून स्कॉटलंडने प्रथम गोलंदाजीचा निर्णय घेतला. वेस्ट इंडीजकडून ब्रँडन किंगने ३० चेंडूंमध्ये ३५ धावा केल्या. कर्णधार शाय होपने २२ चेंडूंमध्ये १९ धावा जोडल्या. त्यानंतर शिमरॉन हेटमायरने मैदानावर फटकेबाजीचा झंझावात घडवला. त्याने ३६ चेंडूंमध्ये ६४ धावांची खेळी करत प्रेक्षकांचे मनोरंजन केले. या खेळीत २ चौकार आणि ६ षटकारांचा समावेश होता. रोव्हमन पॉवेलने १४ चेंडूंमध्ये २४ धावा केल्या. शेर्फन रदरफोर्डने १३ चेंडूंमध्ये २६ धावांची वेगवान खेळी साकारली. शेवटच्या षटकांत रोमारिओ शेफर्डने झटपट धावा जोडल्या. वेस्ट इंडीजने २० षटकांत ५ बाद १८२ धावांचा डोंगर उभा केला.
१८३ धावांच्या लक्ष्याचा पाठलाग करताना स्कॉटलंडची सुरुवात अडखळती झाली. जॉर्ज मन्सीने १५ चेंडूंमध्ये १९ धावा केल्या. कर्णधार रिची बेरिंग्टनने २४ चेंडूंमध्ये ४२ धावांची झुंज दिली. टॉम ब्रूसने २८ चेंडूंमध्ये ३५ धावा केल्या. मात्र वेस्ट इंडीजच्या गोलंदाजांनी सातत्याने गडी बाद करत स्कॉटलंडवर दडपण कायम ठेवले.
रोमारिओ शेफर्डने धारदार मारा करत ३ षटकांत २० धावांच्या मोबदल्यात ५ बळी घेतले. जेसन होल्डरने ३ बळी मिळवले. शमार जोसेफ आणि गुडकेश मोती यांनी प्रत्येकी १ बळी घेतला. परिणामी स्कॉटलंड संघ १८.५ षटकांत सर्वबाद १४७ धावांपर्यंतच मजल मारू शकला.
या सामन्यातील उत्कृष्ट खेळासाठी शिमरॉन हेटमायरला सामनावीर पुरस्कार देण्यात आला. या विजयासह वेस्ट इंडीजने स्पर्धेची सुरुवात आत्मविश्वासाने केली. ईडन गार्डन्सवरील प्रेक्षकांनी या थरारक सामन्याचा मनसोक्त आनंद घेतला.
