जॅक्सच्या अष्टपैलू खेळीवर इंग्लंडचा नेपाळवर ४ धावांनी थरारक विजय
मुंबई (गुरुदत्त वाकदेकर) : आयसीसी पुरुष टी२० विश्वचषक २०२६ मधील पाचव्या सामन्यात गट क मध्ये इंग्लंडने नेपाळवर अवघ्या ४ धावांनी नाट्यमय विजय मिळवला. वानखेडे स्टेडियमवर झालेल्या या सामन्यात अखेरच्या चेंडूपर्यंत उत्कंठा शिगेला पोहोचली होती. विल जॅक्सच्या आक्रमक फलंदाजीसह प्रभावी गोलंदाजीमुळे इंग्लंडने हा सामना आपल्या बाजूने वळवला.
नाणेफेक जिंकून इंग्लंडने प्रथम फलंदाजीचा निर्णय घेतला. मात्र सुरुवात निराशाजनक झाली. फिल सॉल्ट पहिल्याच षटकात बाद झाला. जोस बटलरने १७ चेंडूंमध्ये २६ धावा केल्या. त्यानंतर जेकब बेथेलने ३५ चेंडूंमध्ये ५५ धावांची संयमी खेळी साकारली. कर्णधार हॅरी ब्रूकने ३२ चेंडूंमध्ये ५३ धावांची आक्रमक खेळी करत डाव सावरला. अखेरीस विल जॅक्सने अवघ्या १८ चेंडूंमध्ये नाबाद ३९ धावांची वादळी खेळी केली. या खेळीत ४ षटकारांचा समावेश होता. इंग्लंडने २० षटकांत ७ बाद १८४ धावा केल्या.
नेपाळकडून दिपेंद्रसिंह ऐरी आणि नंदन यादव यांनी प्रत्येकी २ बळी घेतले. संदीप लामिछाने आणि शेर मल्ला यांनी प्रत्येकी १ बळी मिळवला.
१८५ धावांच्या लक्ष्याचा पाठलाग करताना नेपाळने धाडसी खेळ केला. कुशल भुर्तेलने १७ चेंडूंमध्ये २९ धावा केल्या. रोहित कुमार पौडेलने ३४ चेंडूंमध्ये ३९ धावांची संयमी खेळी केली. दिपेंद्रसिंह ऐरीने २९ चेंडूंमध्ये ४४ धावांची झंझावाती खेळी साकारली. अखेरीस लोकेश बामने २० चेंडूंमध्ये नाबाद ३९ धावा करत विजयाची आशा कायम ठेवली. मात्र अखेरच्या षटकात आवश्यक धावा न जमल्याने नेपाळचा संघ २० षटकांत ६ बाद १८० धावांपर्यंतच मजल मारू शकला.
इंग्लंडकडून लिअम डॉसनने किफायतशीर मारा करत २ बळी घेतले. विल जॅक्सने अष्टपैलू कामगिरी करत १ बळी मिळवला. सॅम करन, जॉफ्रा आर्चर आणि ल्यूक वुड यांनी प्रत्येकी १ बळी घेतला.
या सामन्यातील उत्कृष्ट अष्टपैलू खेळासाठी विल जॅक्सला सामनावीर पुरस्कार देण्यात आला. या विजयासह इंग्लंडने स्पर्धेत आपली विजयी मोहीम कायम ठेवली. वानखेडेवरील प्रेक्षकांनी या उत्कंठावर्धक सामन्याचा मनसोक्त आनंद घेतला.
