विवळवेडे येथे श्री महालक्ष्मी माता यात्रा उत्सवाचे आयोजन
दहाणू, (प्रतिनिधी) :
श्री महालक्ष्मी मंदिर ट्रस्ट, विवळवेडे (ता. दहाणू, जि. पालघर) यांच्या वतीने श्री महालक्ष्मी माता यात्रा कार्यक्रम रूपरेषा – २०२६ जाहीर करण्यात आली आहे. या यात्रेनिमित्त विविध धार्मिक कार्यक्रम, पूजा व विशेष विधींचे आयोजन करण्यात आले असून भाविकांसाठी मंदिर दर्शनाची वेळही निश्चित करण्यात आली आहे.
कार्यक्रमानुसार १ एप्रिल रोजी ‘फुलांग’ चढविणे व अंतर्गत पूजेसाठी मंदिर सकाळी ११ ते सायं. ४ वाजेपर्यंत बंद राहील, तर सायंकाळी ४ ते रात्री ११ वाजेपर्यंत दर्शनासाठी खुले राहणार आहे. २ एप्रिल रोजी ‘वाघबारस’ निमित्त पहिला हवन होईल, तसेच रात्री १२ वाजता पुजारी गडावर ढोल-ताशांच्या गजरात जाणार असून मंदिर रात्रभर भाविकांसाठी खुले राहील.
३ ते ६ एप्रिल दरम्यान मंदिर सकाळी ६ ते रात्री ११ वाजेपर्यंत दर्शनासाठी खुले राहणार आहे. ७ एप्रिल रोजी ‘फुलांग’ उतरविणे व अंतर्गत पूजेकरिता मंदिर दुपारी १२ ते सायं. ४ पर्यंत बंद राहील, त्यानंतर भाविकांना दर्शन घेता येणार आहे.
८ व ९ एप्रिल रोजीही मंदिर नियमित वेळेनुसार खुले राहील.
तसेच १० एप्रिल रोजी चैत्र अष्टमीच्या हवनाला सायंकाळी ६ वाजता प्रारंभ होऊन रात्री ११.४५ वाजता पूर्णाहुती होणार आहे. या दिवशी मंदिर दर्शनासाठी रात्रभर खुले ठेवण्यात येणार आहे.
यानंतर ११ ते १६ एप्रिल दरम्यान मंदिर सकाळी ६ ते रात्री ११ पर्यंत खुले राहील, तर १७ एप्रिल रोजी अंतर्गत पूजेसाठी दुपारी १२ ते सायं. ४ पर्यंत मंदिर बंद राहणार असून त्यानंतर रात्री ९ पर्यंत दर्शनासाठी खुले राहील.
यात्रा काळात मंदिर परिसरात मोठ्या संख्येने भाविक उपस्थित राहण्याची अपेक्षा असून ट्रस्टच्या वतीने सर्व भाविकांनी शिस्त राखून दर्शन घ्यावे, असे आवाहन करण्यात आले आहे.
