जेएनपीएमध्ये प्रजासत्ताक दिन उत्साहात साजरासांस्कृतिक व अ‍ॅक्रोबॅटिक्स कार्यक्रमांतून सुरक्षा सज्जता व राष्ट्रीय बांधिलकी अधोरेखित

जेएनपीएमध्ये प्रजासत्ताक दिन उत्साहात साजरा
सांस्कृतिक व अ‍ॅक्रोबॅटिक्स कार्यक्रमांतून सुरक्षा सज्जता व राष्ट्रीय बांधिलकी अधोरेखित.

मुंबई,(प्रतिनिधी) दि. २६ जानेवारी २०२६ —
जवाहरलाल नेहरू पोर्ट प्राधिकरण (जेएनपीए) — भारतातील सर्वात मोठे कंटेनर बंदर — येथे ७७ वा प्रजासत्ताक दिन अत्यंत उत्साहात व देशभक्तीच्या वातावरणात साजरा करण्यात आला. यानिमित्त औपचारिक, सांस्कृतिक व साहसी कार्यक्रमांचे भव्य आयोजन करण्यात आले होते.
समारंभाची सुरुवात प्रमुख पाहुणे श्री. गौरव दयाल, भा.प्र.से., अध्यक्ष, जेएनपीए यांच्या स्वागताने करण्यात आली. केंद्रीय औद्योगिक सुरक्षा दलाकडून जेएनपीएचे उपाध्यक्ष श्री. रवीश कुमार सिंग, भा.रे.व.से. यांच्या उपस्थितीत मानरक्षक सलामी देण्यात आली. त्यानंतर अध्यक्षांच्या हस्ते ध्वजारोहण झाले व राष्ट्रगीताचे गायन करण्यात आले. अध्यक्षांनी यावेळी संचलनाची पाहणी केली. या संचलनातून शिस्त, एकात्मता व राष्ट्रसेवेप्रती असलेली कटिबद्धता ठळकपणे दिसून आली.
सभेला संबोधित करताना अध्यक्ष गौरव दयाल म्हणाले,
“प्रजासत्ताक दिनाचा खरा अर्थ राष्ट्रसेवेसाठी असलेल्या शिस्तबद्ध कर्तव्यभावनेत आहे. देशाचे प्रमुख सागरी प्रवेशद्वार म्हणून जेएनपीए कार्यक्षमता, पारदर्शकता आणि सार्वजनिक सेवेच्या मूल्यांशी सुसंगतपणे काम करत आहे. वाढवण पोर्टसारख्या उपक्रमांद्वारे जेएनपीए दीर्घकालीन राष्ट्रीय संपत्ती निर्माण करण्यासाठी कटिबद्ध असून, स्थानिक उपजीविकेचा सन्मान राखत समुदाय सहभागालाही प्रोत्साहन देत आहे.”
या सोहळ्याचा भाग म्हणून सीआयएसएफकडून डॉग स्क्वॉडचे प्रात्यक्षिक तसेच दहशतवादविरोधी कारवाईचे (काउंटर टेररिझम) सादरीकरण करण्यात आले. या सादरीकरणांतून बंदरातील उच्चस्तरीय सुरक्षा व्यवस्था, सतर्कता व सज्जता अधोरेखित झाली. महत्त्वाच्या पायाभूत सुविधांचे संरक्षण करण्यात सुरक्षा दलांची भूमिका किती महत्त्वाची आहे, हे यावेळी स्पष्ट झाले.
कार्यक्रमात जेएनपीए शाळेच्या विद्यार्थ्यांनी सादर केलेल्या रंगतदार सांस्कृतिक कार्यक्रमांनी विशेष लक्ष वेधले. यासोबतच साहसी अ‍ॅक्रोबॅटिक्स प्रात्यक्षिक तसेच जेएनपीए फायर टेंडरद्वारे साकारण्यात आलेला नेत्रदीपक तिरंगा शो हा या सोहळ्याचा प्रमुख आकर्षण ठरला.
या प्रजासत्ताक दिन सोहळ्यास जेएनपीएचे संचालक मंडळ सदस्य, विभागप्रमुख, वरिष्ठ अधिकारी, कर्मचारी तसेच परिसरातील नागरिक मोठ्या संख्येने उपस्थित होते. या उपस्थितीतून सामूहिक राष्ट्रीय अभिमान व सशक्त समुदाय सहभागाचे दर्शन घडले.
जवाहरलाल नेहरू पोर्ट प्राधिकरणाबद्दल :
जवाहरलाल नेहरू पोर्ट प्राधिकरण (जेएनपीए) हे भारतातील प्रमुख कंटेनर हाताळणी बंदरांपैकी एक आहे. २६ मे १९८९ रोजी स्थापन झालेल्या या बंदराने एका बल्क कार्गो टर्मिनलवरून देशातील आघाडीच्या कंटेनर बंदरात रूपांतर केले आहे.
सध्या जेएनपीए पाच कंटेनर टर्मिनल्स — एनएसएफटी, एनएसआयसीटी, एनएसआयजीटी, बीएमसीटी व एपीएमटी — चालवते. बंदरात सामान्य मालवाहतुकीसाठी खोल पाण्याचा बर्थ उपलब्ध आहे. तसेच लिक्विड कार्गो टर्मिनल बीपीसीएल–आयओसीएल कन्सोर्टियममार्फत व्यवस्थापित केले जाते.
२७७ हेक्टर क्षेत्रावर विकसित केलेल्या बहुउत्पादक विशेष आर्थिक क्षेत्रामुळे (SEZ) जेएनपीए निर्यात-केंद्रित उद्योगांना चालना देत आहे. याशिवाय, जेएनपीए वाढवण येथे सर्व हवामानास अनुकूल, डीप ड्राफ्ट, ग्रीनफिल्ड बंदर विकसित करत असून, हे महाराष्ट्रातील १३ वे मोठे बंदर ठरणार आहे. हे बंदर जागतिक स्तरावरील अव्वल १० बंदरांमध्ये स्थान मिळवण्याचे उद्दिष्ट ठेवून, स्थापनेपासून १०० टक्के हरित बंदर असेल.