डहाणू–खारबाव–JNPT दरम्यान DFCC मार्गावर मालगाड्यांची यशस्वी चाचणी; डहाणू लोकल फेऱ्या वाढण्याची शक्यता
डहाणू–खारबाव–JNPT दरम्यान DFCC मार्गावर मालगाड्यांची यशस्वी चाचणी; डहाणू लोकल फेऱ्या वाढण्याची शक्यता
पालघर (प्रतिनिधी) –
डेडिकेटेड फ्रेट कॉरिडॉर कॉर्पोरेशन ऑफ इंडिया (DFCCIL) अंतर्गत उभारण्यात आलेल्या पश्चिम समर्पित मालवाहतूक कॉरिडॉर (WDFC) प्रकल्पाच्या महत्त्वाच्या टप्प्याची पूर्तता झाली असून, डहाणू–खारबाव ते जवाहरलाल नेहरू बंदर (JNPT) दरम्यान मालगाड्यांची यशस्वी चाचणी मंगळवारी (दि. ३१ मार्च २०२६) घेण्यात आली. यामुळे खारबावपासून दिल्लीपर्यंत थेट मालगाड्या धावण्याचा मार्ग पूर्णपणे सज्ज झाला आहे.
या प्रकल्पाला एप्रिल २००६ मध्ये मंजुरी मिळाली होती. त्यानंतर ३० ऑक्टोबर २००६ रोजी DFCCIL या कंपनीची स्थापना करण्यात आली. सुमारे १,५०६ किमी लांबीचा हा कॉरिडॉर उत्तर प्रदेशातील दादरी ते नवी मुंबईतील JNPT बंदरापर्यंत पसरलेला आहे.
प्रकल्पाची वैशिष्ट्ये
मालवाहतुकीसाठी स्वतंत्र रेल्वेमार्ग
प्रवासी व मालगाड्यांचे विभाजन
डबल स्टॅक कंटेनर गाड्यांची क्षमता
लॉजिस्टिक खर्चात घट आणि वेगात वाढ
उत्तर प्रदेश, हरियाणा, राजस्थान, गुजरात आणि महाराष्ट्र या पाच राज्यांना जोडणारा मार्ग
पालघर–ठाणे पट्ट्यातील महत्त्व
नुकतेच संजाण (न्यू उंबरगाव) ते खारबाव व JNPT दरम्यानचे काम पूर्ण झाले असून, या विभागात प्रथमच पूर्ण क्षमतेने चाचणी घेण्यात आली. त्यामुळे वैतरणा–खारबाव–JNPT दरम्यान मालगाड्यांचा स्वतंत्र मार्ग उपलब्ध झाला आहे.
पश्चिम रेल्वेला मोठा दिलासा
या प्रकल्पामुळे पश्चिम रेल्वेच्या मुख्य मार्गावरील ताण मोठ्या प्रमाणात कमी होणार आहे. सध्या दररोज अंदाजे ५० मालगाड्या मुख्य मार्गावरून धावत होत्या. एका मालगाडीमुळे सरासरी दीड लोकलची जागा व्यापली जात असल्याने जवळपास ७५ लोकल फेऱ्यांइतकी क्षमता अडथळ्यात येत होती.
डहाणू लोकलसाठी ‘गेम चेंजर’
आता मालगाड्या DFCC मार्गावर वळवल्या गेल्यास मुख्य मार्ग मोकळा होऊन डहाणू–मुंबई दरम्यान लोकल फेऱ्या वाढविण्यास मोठी संधी निर्माण होणार आहे.
मात्र, यासाठी रेल्वे प्रशासनाची इच्छाशक्ती आणि लोकप्रतिनिधींचा सातत्यपूर्ण पाठपुरावा महत्त्वाचा ठरणार आहे.
पुढील अपेक्षा
स्थानिक प्रवाशांकडून डहाणू लोकलच्या वाढीव फेऱ्यांची मागणी दीर्घकाळापासून होत आहे. DFCC प्रकल्पामुळे निर्माण झालेल्या नव्या क्षमतेचा उपयोग करून रेल्वे प्रशासनाने लवकरच सकारात्मक निर्णय घ्यावा, अशी अपेक्षा व्यक्त होत आहे.
