बोईसरमध्ये विराज कंपनीच्या प्रकल्पावर जनसुनावणी; समर्थन-विरोधाच्या छायेत जोरदार चर्चा
बोईसरमध्ये विराज कंपनीच्या प्रकल्पावर जनसुनावणी; समर्थन-विरोधाच्या छायेत जोरदार चर्चा
पालघर (प्रतिनिधी) | दि. ८ एप्रिल २०२६
बोईसर परिसरातील विराज स्टील मॅन्युफॅक्चरिंग कंपनीच्या प्रस्तावित प्रकल्पासंदर्भात आयोजित करण्यात आलेली जनसुनावणी आज संमिश्र वातावरणात पार पडली. या सुनावणीत स्थानिक ग्रामस्थांनी मोठ्या संख्येने सहभाग घेत विविध मुद्द्यांवर आपली भूमिका स्पष्टपणे मांडली.
या सुनावणीदरम्यान प्रकल्पाच्या समर्थनात तसेच विरोधात अशी दोन्ही बाजू ठळकपणे समोर आल्या. काही ग्रामस्थांनी प्रकल्पाबाबत ग्रामसभेत आधी सविस्तर चर्चा व्हावी, अशी ठाम मागणी केली. तर काहींनी सुनावणीच्या ठिकाणाबाबतही पर्यायी व्यवस्था असावी, असे मत व्यक्त केले.
पर्यावरणीय दृष्टीकोनातूनही ग्रामस्थांनी महत्त्वाचे मुद्दे उपस्थित केले. विशेषतः नदी व नैसर्गिक जलस्रोतांचे संरक्षण करण्यासाठी कंपनीने आवश्यक ती खबरदारी घ्यावी, अशी सूचना करण्यात आली.
दुसरीकडे, या प्रकल्पामुळे स्थानिक स्तरावर रोजगारनिर्मिती होऊन आर्थिक विकासाला चालना मिळेल, असा विश्वास काही नागरिकांनी व्यक्त केला.
या जनसुनावणीत साधारण, मान, वारंगडे, बारीपाडा, सुतारपाडा आणि गुंदले या गावांतील सुमारे ३०० ते ४०० ग्रामस्थ व सर्व पक्षीय पालघर जिल्ह्यातील नेते व महिला उपस्थित होत्या. त्यांनी आपले आक्षेप, सूचना आणि अपेक्षा प्रशासनासमोर मांडल्या.
दरम्यान, काही आक्षेप नोंदवले गेले असले तरी संबंधित सरकारी अधिकाऱ्यांनी सर्व कायदेशीर प्रक्रिया पूर्ण करूनच सुनावणी पार पडत असल्याचे स्पष्ट केले.
शेवटी, उपस्थितांचे आभार मानत अधिकाऱ्यांनी जनसुनावणी संपन्न झाल्याची घोषणा केली.
